魔法油到底有無用？

愈黎愈多客人問我呢個問題:「魔法油到底有無用？」

Cathy 第一支接觸嘅魔法油，已經係十多年前，當時無咩舖頭有呢樣嘢賣、亦無咩人識呢樣嘢、而家打開IG、各式各樣嘅魔法油，外國巫師品牌、本地巫師手作、單身想識男友用、復合用、催財用、白魔法、黑魔法…各式各樣應有盡有。望落去係得意嘅、吸引嘅，加上價錢唔貴、容易負擔，自然吸引人想試，亦令我諗返起當年曾買過好多魔法油嘅自己。

我個人經驗係，魔法油就好似減肥藥一樣，唔會話佢無用，但幫你落左磅，實際嘅你無改變過，飲食習慣無改變、運動又唔做，咁會唔會翻肥？同埋減肥藥只係幫你表面落磅，可能無左嘅只係水份/ 宿便，但如果你要有肌肉、有線條、瘦得黎靚，除左乖乖做運動，無其他方法。

復合嘅，男朋友搵返你，但如果你無改變自己，仍然係嗰個疑心重、鍾意奪命追魂call、無自信嘅你，佢返左黎都會再走過，令你又傷心多一次。

「但我真係好鍾意佢、好想同佢喺返埋一齊。可以有咩方法？」

喺度要出賣一下朋友嘅故事，Cathy 身邊曾經有一位朋友，曾經為左前男友落左兩次降頭，用左十萬，過程中降頭師不停鼓勵朋友，仲提議朋友不停打電話俾前男友，對方唔聽電話都唔好理，不停打、打到佢聽為止。最後當然復合唔成，朋友終於面對現實放棄，去左外國working holiday散心，本來諗住去一年，點知一去就將近十年（working holiday後繼續喺當地工作），兩年前，朋友返黎香港同我見面，同我講個男仔搵返佢，言談間有意復合，但係我朋友已經唔想接受佢了。

而我嘅客人之中，亦有提及到每次當自己放棄、什至有新男友嘅時候，曾經執著過想復合嘅前男友就會搵返佢，問我點解每個男仔都唔識珍惜？要失去先返轉頭？我會講呢個係大部份人嘅天性，識珍惜嘅人係因為佢自制能力高、本性知足，我地唔需要批判「過後先黎珍惜」嘅人，只係需要諗點樣成為一個會被人珍惜嘅人。

真正吸引前男友回頭嘅關鍵係改變自己嘅行動同想法，提昇自身嘅頻率，「咁係咪唔應該用魔法油？」我唔會叫人唔好用任何嘢，一來因為愈打壓愈抗拒，愈叫你唔用你就愈係心思思想用，二來所有嘢都係有用的、都係黎幫你達至最終目的嘅其中一個過程，兜圈都係成長嘅過程，正如好多的起心肝做運動減肥嘅人都曾經食過減肥藥一樣。但有個建議俾大家：「要減肥的話，唔好問突然瘦左好多嘅人食邊隻減肥藥，因為你同佢都只睇到當下嘅效果，去問嗰啲成功減肥又keep到好幾年嘅人。」

Meditation、睇書、做運動都係好有效提升自己頻率嘅方法，但作為心急的香港人，十個有九個聽完都唔會跟住做，或者做左一兩次就放棄，之後過多一兩星期就再搵我，話「我真係好掛住佢，可唔可以幫我開多次紀錄？」對於呢類客人，我既無奈又心痛，但黑同白之間，其實我地都有另一個選擇的，如果你真係好想要一啲支援，可以試下花精。

花精嘅成份就係好簡單的，「花水」+ 「極少量的酒精作保存用」（唔係護膚品嘅花水呀下）。成份溫和到小朋友同寵物都可以食用（但當然小朋友同寵物需要嘅嘢比較單純，所以只有少量花精寫係寫適合用於小朋友同寵物）。

花精嘅產品描述一般都係簡單嘅，唔會寫一個好勁嘅功效吸引你買，唔會寫你食左就會復合呀、吸引到愛情呀、搵好多錢呀咁，佢主要係幫你調整自己嘅頻率，從而吸引到好事黎到你身邊。但好事即係咩？每個人都唔同，呢個就係花精可愛嘅地方，佢就好似幫助減肥嘅supplement 一樣，你最終都係要改變自己嘅飲食習慣，但你可以當佢係萬寧賣嘅食物纖維/ 酵素，幫你分解下啲毒素咁囉。

Cathy 食過好幾支花精，推介失戀嘅人可以試下Findhorn Flower Essences，入面有一支叫Eros 嘅花精。我自己食完後會感覺情緒好左好多、舒服左、正面左、開心左、最重要係有自信左好多。而自信同自愛就係吸引愛情最基本亦最重要嘅因素。

有關Eros 的介紹文：
https://www.gaiaholisticliving.com/blogs/letstalkaboutholisticwellness/by-my-galentine-eros