(含劇透）
《死因無可疑》絕對係近期嘅「神作」，喺無咩了解過劇情嘅情況下入場，最終被嚇得半死，戲中林嘉欣嘅角色令人極度心寒，但今次我想講陳家樂飾演嘅葉永信。
我諗絕大部份嘅人，遇到葉永信嘅經歷，都會選擇視而不見，或者去到同警察表達左對方好可疑個位就算。但永信選擇不停追查，即使全世界都叫佢唔好搞咁多嘢，即使知道自己會身陷險境，仍然不顧一切地追查。除咗因為佢本性善良，最重要嘅原因係佢嘅童年經歷，覺得哥哥當年自殺，係因為自己無膽喺欺凌哥哥嘅同學面前承認佢地嘅兄弟關係。以致於今次佢不顧一切，都要選擇「做正確的事」。
當佢舉刀想殺沈子玲嘅時候，佢遲遲唔肯落手，我相信導演係想表達佢當下係清醒同理智的，但我清楚感受到佢當下「情願做正確嘅事然後坐監，好過一世受良心責備」亦令我了解到原來某啲情況下，殺人犯都唔一定係兇殘，原來有時候，「善意反會舖成地獄之路」。
2020年係覺醒之年，連電影、電視劇同卡通片都不停浸透住同以往截然不同嘅價值觀，大家會發現一直以黎所相信嘅舊有價值觀同信念未必再合時宜。更多真相會被發掘、更多舊有信念將會被瓦解。