第一位黎自台灣嘅客人分享💁🏼♀️
老實講第一次收到台灣客人嘅諮詢係淆底的，一來因為台灣嘅身心靈發展已經好成熟，二來因為我一向講嘢較隨意、文筆又唔夠優雅⋯但台灣人認真又溫柔，仲要叫我做老師😨當堂嚇一嚇，然後就同Keeper講幫幫手等我收好啲，唔好令客人對香港嘅身心靈界失望。
客人問嘅第一、二條問題都係同人生使命有關，通常問同人生使命，Keeper都會建議大家聽自己嘅心去行，做自己想做嘅事，但今次收到嘅訊息好特別，係叫客人要堅持進修自己唔鍾意嘅學科，因為佢嘅天命正正係要透過呢份佢唔喜歡嘅工作實踐出嚟，呢份工作係會接觸到好多唔認識身心靈、思想較實際嘅人，而客人嘅天命就係要將佢喺靈修時學到嘅智慧，以「貼地」嘅方式幫助佢嘅服務對象，從而幫助更多普羅大眾得到呢份智慧。
至於第三條問題，係一條充滿挑戰嘅問題，客人係一個好喜歡中國歷史嘅人，當中唔知點解特別喜歡諸葛亮呢個歷史人物，而佢嘅問題係：「我同諸葛亮前世係咩關係？」一收到問題時，我嘅表情應該係😨，因為我當年會考中史係唔合格的🤪，亦完全唔了解諸葛亮，佢身邊仲有咩歷史人物我都唔知，好懷疑自己係咪答到呢條問題。但最後原來又係我過慮，keeper就好直接了當地答我：「諸葛亮老婆」，然後就講左一啲當時佢地相處嘅狀況、各自對對方嘅感受俾我聽。（當中並無涉及google 中搵到嘅資料，原來唔洗識歷史都得😛）最後「對答案」時，客人亦搵到同自己感受有相應嘅地方。
今次係一次好特別同有趣嘅體驗，感謝客人比機會我接觸到新奇有趣、自己認知範圍以外嘅事。感謝客人話返俾我知，阿卡西紀錄可以問到啲咩、去到幾遠。有時候，感覺客人對我嘅信任比我對自己嘅信任更多❤️