阿卡西紀錄神奇嘅地方，在於好多時我解讀到嘅訊息都唔係我本人嘅諗法，所以作為一個專業嘅解讀師，即使我喺見到客人問題時已經有啲個人嘅想法浮現左，都唔會同客人講，因為正式解讀時我都會將個人小我嘅想法先放埋一邊，讓路俾客人嘅 keeper 回答。
但有啲問題，即使我未解讀，都已經大約知道 keeper 會點答，例如呢題：「我搵唔搵到我嘅真命天子？」首先，點樣為之真命天子？
結婚嗰個就係真命天子？
結完婚離婚算唔算？
真命天子係咪得一個？
結左兩次婚，邊個先係真命天子？
結左婚，但發現前任先係最愛，咁真命天子係前任定老公？
其次，點解問題會係「我搵唔搵到」，而唔係「我可以點樣搵到」？
如果我話你唔會搵到，你就放棄唔再搵，從此切斷七情六慾？
如果我話你男朋友唔係你真命天子，你就立即分手，再去搵過真命天子嗎？
開阿卡西紀錄嘅意義，在於命運係可以改變，每次開紀錄之前，我都會先唸禱文，而禱文其中一句係咁寫的「阿卡西紀錄將得以重寫，以協助xxx找到自身之光與力量」如果命運唔可以改寫，我地開紀錄、知道自己嘅處境又有何意義？我話你知你犯左天刹孤星，無人會愛你，唔會搵到真命天子，然後你聽完好唔開心、好絕望，對你黎講又有何意義？
如果有任何人同你講：「你命犯孤星，唔會有拖拍」/「你年紀唔細，好難搵對象」/「你又唔係好條件，有得嫁好嫁喇」等說話，我地選擇相信對方係出於善意，但絕對唔係真理。任何令你恐懼嘅說話都唔係出於愛，更加唔會係黎自阿卡西紀錄守護者或任何高靈/天使等更高存在嘅訊息。
對於呢個問題，我一概會擅自幫客人改寫成「我要點樣先搵到我理想中嘅另一半？」命運係一個選擇，無人會天生做孤星，只有因為唔了解自己、無去改變而令自己暫時獨身。亦唔好執著對方係咪「真命天子」，相信自己嘅直覺，珍惜每一次嘅相遇，當相處發生問題時，搵到當中嘅課題比執著對方係咪「真命天子」重要。
（人生係一次快樂嘅冒險遊戲，入面每一個問題、每一道難關都有答案，我嘅責任就如同專頁嘅名一樣，幫大家尋找過關嘅答案。）