我應唔應該做某個決定？

好多客人都會問有關「應唔應該」嘅問題，例如：
「我應唔應該分手？」
「我應唔應該學xxx?」
「我應唔應該投身呢個行業?」

喺阿卡西紀錄嘅角度，除非你問嘅問題係:「我應唔應該吸毒?/ 我應唔應該自殺?」否則Keeper 嘅答案好多時都無絕對嘅應該/ 唔應該，只會話俾你聽，做呢件事嘅結果係點？唔做又可以做啲咩? 你有無呢方面嘅天份？但即使結果係無十足嘅勝算，但你真係好想去做，咁係咪就唔可以做？或者掉返轉諗，如果有人同你講唔啱做你就放棄，咁你又有幾熱愛呢件事呢？

學阿卡西紀錄時，認識到幾位要好嘅靈修同學，我地都會討論去進修其他課程，而佢地都有提過一條問題，就係：「有無問過Keeper 學唔學好?」/ 「我問下Keeper 學唔學好先。」而我雖然經常為客人開紀錄，亦深信Keeper 嘅智慧，但我真係從未問過應唔應該去學習一件事，我只會諗我想唔想學？呢一刻我有無時間/ 有無錢學？如果三個問題都係YES，咁就去學啦！

回想起靈修路上，我洗過嘅錢，買過嘅產品/服務不計其數、亦跟過好幾位老師學習，每次都係無經過好多思考就做決定，當然亦試過無數次中伏，但如果你問我有無後悔？我會好肯定地答無，因為唔係有過「錯」嘅經歷，就唔會知咩係「啱」，亦正如選伴侶，無遇過「錯先生」，俾你一出世就遇到Mr. Right，你又未必識得珍惜佢。每一個經歷，無論表面睇起上黎係好定壞，到最後都唔會係錯的。

容許自己冒險、容許自己隨心而行、相信每一個「錯」嘅決定，目的都係為左帶你去正確嘅地方。