如何可以更愛自己?

Google Search「如何愛自己？」有成千上萬篇文章，但愛自己係一門「知易行難」嘅藝術，作為一個曾經唔愛自己，但而家好很愛自己嘅人，喺度分享少少個人經驗，特別俾我最近幾位「明明好可愛但覺得自己唔可愛」嘅客人（你知道我講緊你的）：

1) 認清你嘅男神並非如你所想高高在上
了解每個人都係獨一無二、亦係潛力股，明白我地唔比任何人高尚，但亦絕對唔比任何人低等。即使萬人迷如彭于晏、姜濤，亦曾經係一個唔起眼嘅肥仔，咁既然肥仔可以變男神，點解你唔可以係女神？

2) 俾時間自己去進步
有客人經歷被另一半背叛，Keeper 叫佢要多啲愛自己，同列出左一啲實際嘅練習俾佢去做，過兩日佢同我講:「我仍然好唔開心，同唔愛自己。」其實愛自己就同減肥一樣，係需要時間先有成果的。想自己兩三日就變成一個好愛自己嘅人，就等如叫自己十日減肥三十磅一樣。當你過去二十幾/三十幾年都係一個負面、自我價值低嘅人，你能夠問：「我點樣可以更愛自己？」已經係一個好大嘅進步，非常好嘅開始，欣賞自己嘅進步、鼓勵自己，俾時間慢慢去經歷同進步。

3) 放棄一步登天嘅幻想
愛自己需要你確實每一日去練習，任何其他療癒工具都只係輔助，當你嘅Keeper俾完建議你，無論你覺得有幾無聊，請你開始認真去做佢俾你嘅練習，先會有成果。正如你嘅健身教練只係為你提供協助，但真正可以令你減到肥嘅人係你自己。聽落好似好灰，無人幫到我，但換個角度去諗，你有主宰自己幸福嘅絕對能力。

4) 運動很重要
運動係世間上最神奇嘅魔法，可以令每個人睇上去更有魅力，網絡上經常流傳50歲似30歲嘅美魔女健身故事，而James P. Owen（華爾街資深投資顧問）亦曾表示佢70歲先開始健身，80歲時佢嘅身體比25歲時更結實。你唔一定要練到一身肌肉，運動亦唔係愛自己嘅唯一方法，但無疑係一個非常見效嘅方法，我地的而且確好少會見到一個有持續做運動但感覺好頹廢嘅人，係咪？今日開始養成做運動嘅習慣，令自己望落去自信啲、積極啲、閃令令啲。

5) 俾空間自己任性
愛自己唔一定係啲「驚天地、泣鬼神」嘅大事，亦唔係幾萬蚊買個名牌手袋俾自己就叫愛自己，唔好過份壓抑自己嘅感受，對於唔喜歡嘅人同事，學識SAY NO 已經係愛自己嘅表現。例如Whatsapp唔一定要立即覆，好多人會取消whatsapp 的藍剔功能，因為怕被人發現已讀不回，但其實已讀不回又如何？你同人簽左合約一定要立即回覆? 又例如老細叫你做嘢唔一定要立即做，都係愛自己嘅表現。善待自己、尊重自己感受嘅人先可以真正善待其他人同對其他人負責任。（因為我知道自己係一個對工作負責任、對公司有價值嘅人，所以我有信心唔會因為唔立即回覆老闆嘅要求就被解僱）

相信自己嘅價值，俾時間自己慢慢去練習，只要你願意開始實行，就可以重新愛上你自己。