如果話蕃茄炒蛋係最易學難精嘅菜式，咁冥想就係靈性工具中嘅蕃茄炒蛋，好容易學（什至可以話唔洗學），亦係好多人靈性成長嘅第一步。
冥想好處非常多：
1. 免費
2. 訓練集中力
3. 紓緩壓力、令情緒穩定
不過明明一樣咁簡單咁美好咁幫到人嘅活動，都總有人講到好複雜，例如：
1. 冥想會撞鬼
2. 冥想可以開第三眼
3. 冥想會有昆達里尼效應、有高潮感受
4. 冥想時可以見到自己前世嘅片段
2. 某啲基督徒話係邪魔之道，基督徒唔應該試
⋯等等
對於呢啲體驗，因為我未試過，我唔會批評，但當我之前聽到靈修同學嘅「神秘體驗」，都曾經非常羨慕，嗰時覺得我都好想接通天地線、想開第三眼、想識得通靈。雖然我唔太知咩黎，但因為聽落好似好勁咁，所以我想有呢種能力。
但有一日突然醒左，問自己：「做咩姐？你靈修當係玩雜技？想其他人覺得你好叻？識啲你識人地唔識嘅嘢？」同時我諗返，我最欣賞嘅一行禪師，佢都無呢啲「神秘能力」，但佢影響到數以萬計嘅人更懂得活在當下、獲得心靈上嘅平靜。
而其實，我一開始冥想都只係想訓練專注力，就係咁簡單，而呢半年黎，都真係好體會到冥想嘅好處，個人平靜左、識得隨遇而安，多左識得抱中立態度去睇人同事，無咩慾望但不停感受到豐盛同愛，所以好想將呢樣咁好嘅嘢推介俾身邊朋友，以下一點個人小心得，希望可以令未試過嘅人唔好將冥想呢樣嘢「妖魔化」或「複雜化」：
1. 可以聽任何你鍾意，覺得舒服嘅音樂
我曾經會特登youtube search "attract money", "attract abundance" 呢一類音樂，後來知道啲嘢你愈想追就愈無，而事實係你個人氣場好、情緒穩定，啲嘢就自然黎，唔洗追。新手打 “Meditation music"，有千百種，唔好理佢個標題講到幾誇張，總之自己覺得舒服relax就用，聽得唔舒服就停 （我而家嘅冥想音樂係muji 嘅background music）😂
2. 所有話開第三眼、或其他你睇唔明係咩嘅音樂都唔好聽。
3. 一開始可以先試幾分鍾，然後十分鐘、廿分鐘、三十分鐘一路加上去，做得耐唔代表叻啲，專注最重要。
4. 做緊嘅時候咩都唔洗諗，專注呼吸，如果無辦法咩都唔諗，可以用有人聲引導嘅音頻。
5. 如果真係好怕合埋眼唔知突然會見到咩（其實真係唔會⋯）可以朝早做，我成日都喺巴士度做，做完返工都醒神啲。
6. 總之記住成件事就只係播歌、合埋眼，專注呼吸，完。冥想唔會撞鬼，撞鬼係因為你成日諗住佢/氣場差/狀態差，唔關冥想事。
而最重要嘅一點，係唔好有壓力，你可以俾個plan自己，例如每日十分鐘，但真係做唔到咪算（例如做做下訓著係十分正常嘅事⋯），每日都係新嘅一日，聽日又可以再黎過。