什麼是光行者？

開業以前，一直以為最多人問嘅會係感情問題，始料不及原來最多人問嘅問題係「我的人生使命是什麼？」幾乎十個客人入面，有八位都會問呢個問題。

每人嘅人生使命不同，唔一定係可歌可泣、聽起上嚟好「勁秋」的先叫人生使命。我遇過相對「平凡」嘅例子有：客人A嘅人生使命係做個好媽媽，照顧好小朋友；客人S本來就係一個溫柔善良、喜歡大自然嘅人，Keeper 話佢本來嘅存在就係一種愛，身邊嘅人、動物同大自然都好喜歡同佢相處，唔需要刻意做咩去達到人生使命，因為佢已經不知不覺地實踐緊人生使命。

但當中亦不乏有客人嘅人生使命係光行者（light worker)，有時客人聽完會話：「但我覺得我做唔到。」、「我都聽其他人講過我係光行者，但我覺得我唔係⋯」關於呢點，其實我都曾經質疑過自己，話說自2018年開始，就不斷有人同我講：「你係light worker黎個喎！」一開始係不以為然，然後就覺得自己無呢個能力，到後來有左通靈嘅能力，仍然會因為聽到人話「light worker 係黎改變世界的。」而覺得自己唔係。因為喺我心目中，發明飛機火箭新藥等偉人先可以叫做改變世界呀！

直到上阿卡西課程時，同學仔不經意講左一句：「唔一定要拯救地球先叫改變世界，只要你改變到身邊嘅人，令佢地感覺舒服一啲、睇嘢正面啲，就已經係改變緊佢地嘅世界。」老師再解釋：「唔一定要做靈性工作先叫light worker，只要能夠喺自己工作嘅崗位發光發熱、喺工作中脫離一啲慣性嘅模式，就已經係光行者。」另一同學再補充：「我認識一個朋友喺政府部門工作，佢負責嘅部門，主要工作係接收投訴，俾市民鬧就係工作日常。但奇怪嘅係，經我朋友接手嘅個案，通常都係嬲住黎、笑住走。」呢個就係光行者嘅一個活生生例子，當自身帶住愛、慈悲同正面嘅能量，無論處身邊個行業、邊一個職位，都總能從中發揮到光行者的特質。

最後要一提嘅係，每個靈魂都有佢嘅人生使命，當中並無高低之別，就好似光行者嘅地位不比家庭主婦高，要將一個嬰兒照顧到長大並成為一個正直善良嘅人係絕不簡單，所以無論你嘅人生使命係咩，都唔好輕視自己或過份驕傲，每人生命都有其意義，每個靈魂皆屬平等。